Qo'noS QonoS

chovnatlh wa'

DIS cha'SaD, jar wa'


mataghqa'

Qo'noS QonoSDaq bIpawba'. chovnatlh wa' 'oH Dochvam'e'. naDev DIvI' Hol Datu'be'. tlhIngan Hol DalaDlaHbe'chugh vaj Daq muj 'oHchu' Daqvam'e' 'ej bImejnIS. 'ach bIghojrup 'ej bIqeqqang 'ej qaDmey Qatlh DanIDvIpbe' bIratlhlaH. bIQaghchugh yIjeghQo'. Hol vaj DarurnIS. QaghmeylIj yIjey. mISlIj yIQaw'. wej Dochmey yIyajnIS neH: DIpmey wotmey chuvmey je. 'e' yIqaw 'ej tugh bIpo'choH.

ghItlhvam HIDjolev


jatlh lengwI'

ja'wI' yIqIH

loQ jInoy. lengwI'na' jIH. pIj jIleng net Sov. reH lengqa'law' qorDu'wIj. tuq yupma' DISuch. yoSmey HopDaq maghIQ. Dat maleng. lenglaHbe' 'op nuv 'e' vISov. vaj yInwIj wanI'mey tIvlaHmeH latlhpu', lengmeywIj vIDel. yInwIj 'ay' bejlaw'mo' vay', chaq vIQuchmoH. vaj QonoSwIj yIlaD. DatIvchugh, jIbel je. DatIvbe'chugh, DalaD 'e' yImev!

rut Dal wanI' vISIQbogh. rut Dajqu'. chenmeH leng naQ, tay'nISba' Hoch wanI'mey. vaj qaSchugh vay', vIqonrupbej. 'op wanI' vIqonQo', 'ach wanI'meyvetlh luSovnISbe'lu'. De' lI' Sovlu'DI' chaq Do'Ha'...

tagh QonoS

toH. qen cha'logh Las Vegas vISuch. June pa' ghom vavwI' SoS tuq. Hoch DIS maghom. Hoch DIS wanI' cher qorDu' pIm. wej ben Ohio-Daq maghom. cha' ben Texas-Daq maghom. wa' ben Indiana-Daq maghom. Las Vegas-Daq qaS 'e' wuq DaH cherwI', HochvaD qutlhlaw'mo' leng. lugh ghaH. qutlhbej mebpa'mey. qutlh je Soj. loQ qutlhbe' puvbogh lupwI', 'ach waghqu'be'mo' yon HochHom.

roD tuq wanI'Daq jaH qorDu'wIj, yavDuj wIchIj 'e' wImaS. tIn Dujmaj qoD 'ej tun quSmey. QongDaq mojlaH 'o' quS. nI'chugh leng, QonglaH raQpo'pu'. pImnIS wanI'vam. Hopmo' Las Vegas, puvbogh lupwI' wIlIgh 'e' wIlaj. vaj leng qutlh wISuqmeH, Duj Suy' wIra'. nulobchu' 'ej ghaytan leng wISuqbogh qutlh law' Hoch qutlh puS. Do'Ha' Qatlhbej leng. "Delta" Dujmey DIlIghmo', "Atlanta" wIghoSnIS rInpa' leng. reH "Atlanta"-Daq Duj tamnISlaw' Hoch.

"Atlanta" Dabbogh jupHom vIrI'. not maqIHchuqpu' 'ach De'wI' QujDaq pIj maghomchuq. qIHmeH 'eb vIjon vIneH 'ej Qochbe' ghaH. vaj vengDajDaq SaqDI' Duj wIlIghbogh, nughom jupvam. tlhetlhqa' lengmaj 'e' wIloStaHvIS, 'uQ wISop. tlheDbeH Duj cha'DIch 'e' wIloStaHvIS, "card" Quj ghaH puqloDwI' je. rut ngorrupmo' puqloDwI', DughnIS jup. Qujqangmo' ghaH, vInaDqu'. puqloDwI' QuchmoHbej.

Las Vegas-Daq tay'choH tuq qorDu' law'. javmaH nuv maH. malaw'mo' matay'chu'be'. motlh reHmeH tlhejchuq qorDu' puS. rut reH be'nI'wI' cha' puqpu', puqwI' je. rut tlhej vavwI' loDnI' puqloD Qup. 'ach pIj mob qorDu'wIj mach. wa'logh tay' Hoch jeSwI'pu'. Wednesday 'uQ wISopmeH, Qe' wIjaH 'ej ghommeH pa' tIn wIDan. lIH'egh Hoch. ghot law' vIghomqa'. ghot puS vIqIH. wa' nem ghomqa'ghach nabchoHlu'. loQ cha' nem ghomqa'ghach nablu'. chaq "Alaska"-Daq qaS.

pImchu' Alaska Las Vegas je. tujqu' Las Vegas muD 'ej QaD. wovqu' Las Vegas chal 'ej Huvchu'. pa' maghomtaHvIS 'engmey vIleghbe'. pa' mayIttaHvIS QaDchoH wuSmaj 'ej bIQ wItlhutlhnISbej. QaDchoHchu'mo' puqloDwI' wuSDu' 'oy'choH. ghaH vIHaghmoHDI' bep. jatlh HImonmoHQo'! tlhutlh neHbe'. wuSDaj ghoHlu' neHbe'. wa'logh reghchoH nujDaj. nom tlhutlhqangchoH 'ej wuS HerghHom jeD lajchoH. Do' ru' 'oy'Daj.

Las Vegas-Daq law'bej much'a'mey. loQ ngajmo' poHmaj, muchmey puS DIbej. waghqu' 'op. bIH DIbejbe'. qutlh 'op. wa' wIbej. 'op bejlu'meH, DIlnISbe'lu'. bIH puS DIbejbej.

Dat qach'a' luleghlu'. wa' qach tlhopDaq, vay cha' bIQ Duj. Doj may' 'ej wa' bIQ Duj Qaw' latlh. qaStaHvIS may'qoqvam, bej nuv law'qu'. rInDI', law'qu'mo', tlhoS mamejlaHbe'. QIt vIHchoH ghom'a'.

latlh qach tlhopDaq vaHbo' ngeb tlhuD HuDHom ngeb. SeS qul je rurlaw' bIQ luDoqmoHbogh wovmoHwI'mey. QoQ tam wIQoylaw' 'ach nuDuQbe' much.

"Circus Circus" mebpa'meyDaq maQong. pa' muchHommey lumuchlu'. Ha'DIbaHmey ra'chu' wa' nuv. Sup loS nuv 'ej muDDaq DIng 'ej puvlaw' SIrghvo' HuStaHvIS. cheSvel mIv je tuqtaHvIS wa' nuv, tlhaQqu' neH. jontaH mIvDaj 'ej tlhay'mey SamlaHbe'law' DeSDu'Daj. nuHaghmoHchu'.

veng botlhDaq much Dajqu' leghlu'. wa' He DungDaq chenpu' bebHey. taghDI' ram, bebDaq cha'choH wewwI' nguv. Qorwagh le' mojlaw' beb. HaSta tIq Da. mabejtaHvIS, QoQ wIQoy je.

Hilton-Daq "Star Trek: The Experience" wISuchba'. 'oH vIDelbe', 'ach vInoHqangchu': Dunqu'! muchna' 'ellu'pa', law' bey'. Sut luch nuH je lu'anglu'. "Quark's" Qe'Daq maSop. pa' yIttaH tlhInganHey. jawtaH. vaj cholDI' vIjatlh: 'IH jaj, qar'a'? jIqIDba'. SIbI' mubuS 'ej jatlh: tlhIngan Hol Dajatlh'a'? mu'tlheghmey puS wIjatlh 'ej mayajchuq 'e' luHarlaw' 'IjwI'pu'. loQ qar. QaQqu' tlhInganHey QIch 'ach mu' puS Sovlaw'. mu'tlhegh HIDjolev lo'law'.

Las Vegas-Daq SuDlu'ba'. loQ jISuD jIH, 'ach Huch law' vIlonbe'. "nickel" janDaq neH jIQuj. Huch vIlojmoHmeH, nI'nISmo' poH, Quj ram neH 'oH 'e' vIwuq. rInpu'DI' wa' rep, wa' DeQ neH vInobpu'.

nI'qu' juH wIcheghmeH leng. cha'maH cha' vatlh rep Las Vegas-vo' matlheD. "Atlanta"-Daq mayevnISqa'. vagh vatlh rep pa' wIpaw. qaStaHvIS loS rep maloSnIS. ravDaq Qong puqloDwI'. Qong je be'nalwI' 'e' nID. jIba' 'ej jIloS neH. jIDoy'bej 'ach jIQonglaHbe'. juH jIHtaH vIneHqu' neH. Do' malengtaHvIS qaS wanI' ramqu'. qetlh leng. nI' neH.

be'nalwI' SoS juHDaq DujwIj vIverghta'. DunqluQ juHvetlh wIpaw. ja'chuqtaHvIS be'nalwI' SoSDaj je jIDum. tugh jIDoy'be'choH. 'uQHom wISoppu'DI' juHmaj wIghoS. choS juHna'majDaq maHtaH. vaj rIn leng 'ej taghqa' yIn motlh.


tlhIngan Hol wa'Hu', tlhIngan Hol wa'leS

yIn tlhIngan Hol. Holvam wIjatlhtaHvIS, not Hegh. ghommajmo' yInmo' tlhIngan Hol, wIHemnIS! po'bej ghommaj jatlhwI'pu'. jupma' mojbejta' matlh. Hol wIyajchoHmeH 'ej wIghojmeH nuQaHqangbej. Dun ghu'vam: maHvaD Dun, 'ej HolmajvaD Dun.

wIHemnIS, 'ach maDughnIS. po'bej ghommaj jatlhwI'pu', 'ach law'be'. pIjHa' jatlhwI' chu' DImuvmoH. tlhoS not jatlhwI' po'bej moj. choHbe'chugh ghu'vam, not SachlaH tlhIngan Hol jatlhwI' nugh. 'ej not Sachchugh, nupbej. chaq SIbI' nupbe', chaq QIt nup, 'ach nupbej.

chay' ghu'vam wIDublaH?

tlhIngan Hol ghojwI' DIqelDI', vagh patlh tu'lu' 'e' vInoH. patlh wa'DIch vIDel. chaq tlhIngan Hol mu'ghom luje'pu' (pagh, noblu'), 'ach wej lulaDchu'. tlhIngan Hol lulo'chugh, lulo'Ha'bej. ghaytan SaHbe' je. tlhIngan Hol lulo'bogh Hoch Hov leng qonwI''e' Del patlhvam. tlhIngan Hol luSovchu' luneHbe'. SaHchugh, chaq patlh cha'DIch luchav. patlh cha' lupawDI', law'logh tlhIngan Hol mu'ghom lulaD. mu'tlhegh puS qon 'e' lunID. chaq DIvI' Hol ghItlh mugh 'e' lunID. chaq [David Barron] ghojmeH pat lulo'choH ('ej chaq lurIn). patlh wejDIch luchavDI', QummeH tlhIngan Hol lulo'laH. 'op tlhIngan Hol mu'tay' qaw. ghaytan <tlhIngan Hol yejHaD> lumuvta'. chaq jabbI'IDghom lumuvta' je. veb patlh loS luchavbogh jatlhwI' po'. qaStaHvIS DIS law' tlhIngan Hol lulaD 'ej luqon 'ej lujatlh. qIb lengwI'vaD tlhIngan Hol lulaDchu'. ja'chuqDI' jatlhwI' po', mu'ghom pab joq lo'nISbe'.

letlh rur patlhmeyvam. ngeDmo' patlh wa'DIch SIchmeH mIw, patlhvetlh luchav ghot law'. letlh lutoStaHvIS, QatlhchoH patlh veb SIchmeH mIw. Qatlhmo' toSmeH mIw, moghchoHlaH ghojwI'. moghchoHchugh, patlh veb SIchpa' jeghlaH. Hamletvo' mu'tlhegh vIngIp: waQlaw' ghu'vam. letlhvam toStaHvIS ghojwI', DIQaHmeH mIw wIchennISmoH.

ghaytan SaHbe'mo' patlh wa'DIch jatlhwI'qoqpu', letlh toSmeH chay' DIQaH? ghojmoHmeH pat nap wIchennISmoH. Hov leng tIvqu'mo' tlhIngan Hol lutu'. tlhInganpu' DataHvIS tlhIngan Hol jatlhlaw' neH. mIwvam wIngeDnISmoH. ghojmoHmeH pat chennISmoH Qujchaj yajbogh vay''e'. napqu'nIS patvam. qaDqu'chugh patvam, ghaytanHa' DISIgh.

patlh cha' SIchDI' vay', letlh luSaltaH chay' 'e' wIchav? ghojmoHbogh paq chennISmoHlu'! taghwI'vaD ngeDlaH paqvam, 'ej ghojtaHvIS qaDchoHlaH. 'ach yapbe' wa' paq. latlh ghojmeH pat wIchenmoHlaH. qeqmeH paq. laDmeH paq (wa' chovnatlh 'oH QonoSvam'e'). puvchoH Duj rur Holvam; Do yap wIchavbe'chugh, not mabavbe'choH, 'ej yuQDaq wIngeQbej. DaH wIchungbe'; wIqugh neH. machungchoHbe', Do yap wIchavbe' 'ej wIghIrchoH.

patlh wej luSIchDI' ghojwI', patlh loSDaq Sal chay' 'e' wIchav? DaH wa' nab neH wIghaj: taghwI'vaD pab ghojmoHwI' gheS ghuv. nabvam neH wIwuvlaHbe'. not SachlaH ghommaj. chaq QonoSvamvaD ghItlhmey ghaqlaH chaH. ghItlhmeyDaj DIlchoHlaHchugh <tlhIngan Hol yejHaD>, ghaytan ghaqbej. (ghItlhmeyDaj DIlughnISmoHbej, qar'a'?). latlh qechmey vaQ wIchennISmoH je.

vaj, jatlhwI' po': tlhIHvaD jIjatlhba'. wIpIlnISchoH! Holvam wItaHmoH wIneHchugh, mavangnIS!


tera'vo'

qen tera' malja'vaD Qu' chu' vIlaj. chu' malja'vam 'ej mach, 'ach QIt SachbejtaH. taH'a' malja' wej 'e' vISovchu' 'ach 'e' vIpIH. valqu' pa' vumbogh nuvpu' 'ej po'qu'law'. pa' jIvumtaH 'e' vItIv.

tera'ngan malja'Daq vumDI' tlhIngan, rut QatlhlaHba' ghu'. pImbej Human tIgh tlhIngan tIgh je. nIteb pa' tlhIngan jIHmo', reH Doch law' vIghojnIS. Quj Huj'e' luQujtaHbogh Humanpu' 'oH wa' tIgh'e' vIghojnISpu'bogh. vIDel.

raS tIn yorDaq Qujlu'. SuDchu' yor 'ej 'oHDaq wa'maH jav naghHeymey tu'lu'. moQna' bIH 'ej letqu'. nuq bIH? jISovchu'be'taH jIH. chaq DoS bIH. chaq ngoQmey. chaq tu'HomI'raH neH. lujaDlu'chugh nuH vaQ bIHlaHbej 'ach Do'Ha' reH raS yorDaq ratlh. jaS nguv moQmey 'ej Hoch ghorDaq mI' tu'lu'. vaj nagh wa'DIchDaq mI' wa' tu'lu', 'ej mI' cha' ghaj vebwI'. wa'maH vagh cha' QavwI'. le' wa' moQ; mI' ghajbe'. chISchu' 'oH. ghaytan pagh 'oH mI'Daj'e'.

jav tu'lumHey ngaS raS yor HeHmey. tu'lumHeyvamDaq ghoSchugh vIHbogh moQ, yorvo' tu'lumDaq pumlaH. 'ej 'e' luqaSmoH 'e' lunID QujwI'pu'. nagh vIHmoHmeH naQ lo'lu'. chISwI' le' mupmeH naQ lo' QujwI', ghIq latlh mup chISwI', 'ej po'chugh ghaH 'ej Do'chugh, tu'lumDaq pum latlh. 'ach pumchugh chISwI', qab. chISwI' mupmeH neH naQ lo'lu'; jagh QujwI' qIplu' net chaw'be'.

raS taQDaq Qujmey pIm Qujlu'. rurchuqlaw' Hoch 'ach loQ pIm chutmey lupabnISlu'. motlh malja'wIjDaq wa' Quj wImaS. QujvamvaD mI'mey mach ghajbogh moQmey'e' pummoH wa' QujwI' 'ej mI'mey tIn ghajbogh bIH'e' pummoH latlh. QujvamvaD le' nagh chorgh. qIj 'oH. machbe' 'ej tInbe' mI'Daj. Hoch naghDaj pummoHta'DI' QujwI', qIjwI' pummoH 'e' nIDlaH ghaH. 'ach nIDpa', wa' tu'lum ngu'nIS 'ej tu'lumvetlhDaq pumnIS qIjwI'. qaSchugh, Qap. 'ach tu'lum pImDaq pumchugh qIjwI', luj ghaH. pumbe'chugh neH, taH Quj. qIjwI' pummoHchugh QujwI' pumpu'pa' Hoch moQmeyDaj, luj ghaH. pumDI' qIjwI', rIn Quj.

Quj taghmeH, yor DopDaq mI'mey ghajbogh naghmey'e' lughommoHlu'. wej HeH ghajbogh jan'e' lo'lu'. nIteb yor Dop latlhDaq chISwI' lanlu'. naghmey ghomHa'meH chISwI' bach QujwI' wa'DIch. pumchugh vay', bachqa' ghaH, 'ej mI'mey mach mI'mey tIn joq wIv. pumchugh pagh, bach latlh; pumDI' nagh wa'DIch, wIv QujwI'vetlh 'ej bachqa'. taHtaHvIS Quj bachqa' moQDaj pummoHbogh QujwI''e', 'ach pumchugh pagh pagh pumchugh jaghDaj moQ, bachchoH latlh. chISwI' pummoHDI' vay', qay'. qaSnIS nuq? chut wIyajchu'be' 'ej maQoch.

QapmeH po'nISbejlu', vaj Dalchu'be' Qujvam. 'ach 'oy'moHbe'. tlhInganvaD motlhbe' Quj, 'ach vIparHa'choHlaw'taH. vIHaDtaH.


Qo'noS QonoS juH chegh

[juH]

tlhIngan Hol yejHaD juH chegh

[Duv]